Mişleş – Car (Zaqatala şəhərindən)
Mişleş – Car: 14km, +373m/-238m (Ş → Q)
Bu hissə ehtiyatlarınızı yeniləmək və şəhər rahatlığından (imkanlarından) faydalanmaq üçün bir fürsətdir. Marşrut Zaqatala şəhərindən keçərək marketlər, otellər, parklar, tarixi abidələr və kafelər kimi ehtiyaclarınıza uyğun məkanlara çıxış imkanı yaradır.
Marşrut şəraiti
Bu marşrut həm asfalt, həm də çınqıllı kənd yollarını əhatə edir.
Su
Zaqatala şəhəri və Car kəndi boyunca müxtəlif bulaqlar mövcuddur. Şəhərdə marketlərdən su ala bilərsiniz. Kənd evlərində qalırsınızsa, kran suyunu içmək mümkündür.
Cığırın başlanğıc nöqtələri
Zaqatala şəhəri geniş asfalt yollarla əhatə olunub. Car kəndinə aparan çınqıllı yollar isə əksər nəqliyyat vasitələri üçün uyğundur. Mişleş kəndinə birbaşa avtomobillə getmək üçün 4×4 nəqliyyat vasitəsi tələb oluna bilər.
Marşrut üzərindəki imkanlar
Bu marşrut boyunca çoxlu sayda mağaza, bazar, yemək yerləri və qalmaq üçün məkanlar mövcuddur.
Alternativ marşrutlar
Zaqataladan keçərkən öz marşrutunuzu seçə bilərsiniz. Tövsiyə olunan cığır, bəzi məşhur yaşayış məkanlarını və mədəni abidələri əhatə edir.
Mədəni irs abidələri
Zaqatala Qafqaz tarixi baxımından maraqlı və əhəmiyyətli bir bölgədir. Qədim Albaniya irsindən Rusiya imperiyası dövrünə qədər müxtəlif mədəni təsirlərə malikdir. Çoxmillətli əhali tərkibi ilə fərqlənən bu bölgədə avarlar, ingiloylar və saxurlar yaşayır. Yerli iqtisadiyyat kənd təsərrüfatı və sənətkarlıq sahələrini əhatə edir. Xüsusilə bal istehsalı və ipəkqurdu yetişdirilməsi məşhurdur.
Car kəndi isə özünəməxsus tarixi gözəlliyi ilə seçilir. Əsasən avarlar tərəfindən məskunlaşıb və burada XVII əsrə aid məscid kimi müxtəlif tarixi abidələr mövcuddur.
Əsas görülməli yerlər:
- V əsrə aid qədim alban kilsəsi (sakinlərin həyətində yerləşir)
- İmam Şamil abidəsi
- Çingizqala (Car kəndində yerləşən müdafiə qalası)
- Zaqatala qalası (1830-cu ildə tikilmiş, hərbi qarnizon və məhbuslar üçün istifadə olunmuş, o cümlədən məşhur “Potyomkin” üsyançıları burada saxlanılmışdır)
